隨住競技類手機遊戲興起，除咗吸引部份廠商推出「電競手機」，市面上亦出現大量外接手制、散等相關配件。知名遊戲設備製造商Razer都唔執輸，最近就推出打機專用指套「Razer Gaming Finger Sleeve 」，聲稱能夠提升操作準確度，令玩家激戰時保持手指乾爽，掌控全場。

根據官方資料，呢款指套由高導電性銀纖維編織而成，可以減少摩擦同時增強觸控靈敏度及螢幕反應速度，而指套本身只有0.8mm厚，具備吸汗透氣及可水洗重用特性，令玩家長時間遊玩仍然保持手指舒適乾爽，喺戰場上大殺四方。

雖然戴套打機點都會有層隔膜唔舒服，但對於手汗多嘅朋友可能係一個好選擇。目前指套以一套兩隻形式發售，定價為$9.99美金（約$78港幣），有興趣嘅朋友可以去Razer官網訂購。