為進一步推廣高達模型文化，日本BANDAI HOBBY近日推出全新企劃「GUNPLA 君（ガンプラくん）」，以二頭身卡通風格造型推出迷你模型、宣傳影片（PV）以及其他週邊商品。打頭陣嘅將會有RX-78-2高達、馬沙專用渣古以及量產機MS-06渣古II。

官方喺今日公開10集各長一分鐘嘅PV，故事講述主角「GUNPLA君」從BANDAI靜岡工廠生產線誕生，對自己身為模型感到非常驕傲，性格非常熱血，旨在向世界傳達砌模型嘅樂趣，而同時誕生嘅仲有綠色渣古「ZAKUPLA君」同埋馬沙專用渣古「CHARZAKU君」，前者因為身為量產機而感到有啲自卑，而後者看似高傲，實際上非常容易受挫。可惜嘅係，目前影片只開放畀日本地區觀眾收看，想睇嘅可能就要自己搵方法。

除咗PV之外，官方打後亦會推出一系列模型以及周邊產品，預計9月起率先於東京/福岡官方旗艦店GUNDAM BASE、橫濱/名古屋/橫岡GUNDAM BASE SATELLITE發售6款鎖匙扣（圖10），每款售價為660日圓（約$47港幣），至於模型售價及推出日期仍然有待公布。

（圖片截自：ファミ通）