隨住疫情影響加上網絡購物興起，全球各地愈嚟愈多實體零售店相繼執笠，就連國際時裝品牌Gap前排都宣布要關閉英國所有門店，留低一大堆「吉鋪」。為咗將土地物盡其用，其實美國早喺幾年前就試過將百年舊商場翻新成住宅，既可以保育古蹟又能夠解決「土地問題」。唔知香港又有冇得參考下呢？

位於美國羅德島州普洛威頓斯市嘅「The Arcade Providence」建於1828年，係美國最歷史悠久嘅商埸，以希臘復興式建築風格為主。經歷時間推移商場早已風光不再，有段時間更係一個得小貓三四隻嘅「死場」，直到2016年財團Westminster Street Associates斥資1000萬美元改建成住宅及商鋪綜合體，先至令商場重回昔日光彩。

現時樓高兩層嘅The Arcade Providence，地下總共有17間商店，而二樓則有48套充滿設計感嘅單位，有兩房或三房選擇，面積由225呎至450呎不等，月租為550美元起，相比起同區嘅住宅，已經算係幾化算。唯一嘅缺點可能就係放假嗰陣可能會非常嘈，樓下又有一堆人行嚟行去Shopping。