隨住智能電話影相愈嚟愈清，功能愈嚟愈強，唔少人影完相都會「大執」一輪先放上社交媒體，更何況依家坊間有N款修圖Apps，幾下手勢就可以將包包臉變V臉，排骨仔都可以變猛男，網上照片一早變得不可相信。有見及此，挪威最近大比數通過一條法案，強制KOL賣廣告要標明「P圖」部份，否則輕則罰錢、重則坐監，從而杜絕網絡「照騙」。

（圖片截自：MIC）

近日挪威議會以75比15大比數通過一項《市場營銷法》修正案，規定名人或KOL喺社交媒體賣廣告嗰陣，如果有修改身體形狀，例如P到變大眼、變大隻仔、瘦臉瘦身等等，就需要清楚標明及披露，不過就未知新規例包唔包括照片亮度或飽和度調整。

隨住坊間有N款「P圖」Apps出現，執相門檻變得極低，任何人都可以執到變靚女/仔。

據了解，今次新例源於「kroppspress（英：body pressure）」爭論，挪威兒童及家庭事務部向議會提交文件引述一項研究，指出首都奧斯陸超過一半中四女學生無論喺公共場所定係社交媒體都飽受巨大壓力，厭食症亦係年輕女性第三大死亡原因，認為網絡虛假照片加劇年輕人自卑感，希望立法整頓歪風。

資料來源：buzzfeednews