今年一月嘅時候，日本成人用品品牌TENGA就宣佈會發射一支「TENGA火箭」上太空，甚至仲舉行咗一個眾籌，不過最後只係籌到180萬Yen (約HK$12.5萬) 經費，即係目標500萬Yen嘅三份一左右。雖然十令萬港紙就肯定唔夠支付所有成本，但TENGA依然繼續推動計劃，而「TENGA火箭」亦於日前正式完工，準備射上太空！

呢支「TENGA火箭」由Interstellar Technology負責製造，整體外型與一月時公佈嘅設計大致相同，最搶眼都係紅底白字嘅TENGA標誌「愛與自由與TENGA」，但除咗個樣之外，TENGA方面就連支火箭實際有幾長都冇公佈。

據1月時公佈嘅計劃，「TENGA」火箭最主要嘅目的，其實係為咗收集太空數據，以研發出太空中都能夠用嘅TENGA飛機杯。另外品牌吉祥物TENGA機械人亦會乘坐火箭升空，並希望能成功回到地球。最後火箭亦會載有1000名男士嘅願望，據報會於太空中射哂出去，當係祈福咁啦。

TENGA指，TENGA火箭將於今年夏天內，於日本北海道發射，但就未有公佈確實日期。

資料來源：TENGA