大家成日都話，藝術呢家嘢就係互相參考下再加啲新嘢推陳出新，所以唔少作品都會有「致敬」嘅情況出現。但近日一套中國科幻電影《天馬行空》，就被人話張宣傳海報已經唔係致敬咁簡單，直頭係「Copy and Paste」，引起網民熱烈討論。

《天馬行空》宣傳海報。（圖片截自：微博）

據了解，呢套名為《天馬行空》嘅科幻電影時空設定為2080年，地球成為各星球移民嘅聚集地，大家都稱呼為「星際城」。一場突如其來嘅災難，星際城被天馬座流星雨撞擊，調解員海棠無意間發現隕石碎片竟然會令生物發生變異，為求查清真相，一眾主演就展開一場拯救地球嘅故事。

《Halo 4》概念圖。（圖片截自：halopedia）

就咁睇劇情簡介，《天馬行空》就係一套災難科幻片，再講述中國人點樣拯救世界，無咩地方會受到批擊。不過就因為張宣傳海報同遊戲《Halo》入面嘅士官長太過相似，而被網民鬧抄襲。有人就挖出《Halo 4》嘅概念圖，只要將張圖翻轉再併埋一齊睇，就會發現根本一模一樣。

除咗電影海報個士兵似《Halo》嘅士官長之外，有眼利嘅網民就發現原來《天馬行空》個「空」字嘅外星人圖案都好似抄襲Dell旗下嘅遊戲電腦牌子「Alienware」Logo。不過公道啲講，其實外星人圖案來來去去都係差唔多樣，又唔一定係抄嘅。

（圖片截自：微博）

最搞笑嘅係，就連Xbox中國官方微博都走出嚟抽水，話《Halo（光環）》嘅故事並非「天馬行空」，士官長會嘅故事會喺今年冬天發布嘅新作《Halo Infinite（光環：無限）》繼續，似乎就叫大家唔好被《天馬行空》張海報Fake到，《Halo》系列並冇打算拍真人版電影。

資料來源：gamerant、微博