日本人氣漫畫《一拳超人》入面嘅超級英雄「埼玉」老師，只要一拳就可以秒殺所有對手，令其他角色望塵莫及。「埼玉」曾透露佢嘅「地獄訓練方式」，就係每日跑10km、100個掌上壓、100個Sit-up、100個深蹲持續三年，繼而獲得一拳秒殺能力，不過代價就係變成禿頭。

當然呢啲只係漫畫情節，大家聽完都會笑下就算。日本有位Youtuber就唔信邪實測咗一年，雖然最後無獲得一拳秒殺能力，亦都無禿頭，但就瘦咗25.1公斤。

日本Youtuber「地獄寺紅蓮丸」近日上載一條影片，記錄佢依照「一拳超人訓練法」持續鍛鍊一年成果。從一個168cm、82.7kg從來唔做運動嘅肥仔，變成57.6kg鋼條型身材，體脂從28.8%減至10.1%、肌肉量從55.5kg減至49.1kg。不過就因為未達到最初定立嘅目標55kg，所以剃光頭找數。

「地獄寺紅蓮丸」從起初幾下動作都做唔到，到後期姿勢愈嚟愈標準，而且就算落雨、去迪士尼玩都堅持每日訓練，並改善過往不良飲食習慣，改以高蛋白，低卡路里食物為主。條片上載咗唔夠1個禮拜已經有接近200萬觀看次數，網友們都留言大讚佢非常有毅力，羨慕佢有一個好女友陪伴加油打氣。想變強（減肥）嘅你，睇完仲有咩藉口？