現年52歲嘅福山雅治婚後人氣大不如前，早前宣布時隔8年再次扮演「湯川學」教授，拍攝《神探伽利略》第三部電影及特備劇，期望再創事業高峰。最近有日媒就影到福山現身於橫濱市拍外景，身旁女拍擋竟然唔係柴咲幸或吉高由里子，而係年輕女星新木優子，唔通換咗女主角？

根據日媒《女性自身》偷拍照片可以見到著上西裝嘅福山依然型格，等埋位開拍時仍不忘戴上防護面罩抗疫，完全睇唔出已經52歲。而身旁女拍檔則換成現年27歲嘅新木優子，令外界懷疑新一部《神探伽利略》係咪將會換女主角。

對比起第一季《神探伽利略》，福山雅治好似無老過。（圖片截自：imdb）

新木優子早於小學五年級就被星探發掘，曾經喺阿部寬主演電影《青鳥》以及《告白》客串過學生，其後被女性時尚雜誌《non-no》睇中成為專屬Model。另外亦主演過多部日劇及電影，憑著甜美清新外貌被網友封為「透明系女神」，人氣直迫新垣結衣。若果佢真係成為第三任「湯女郎」，相信呢對相差25歲嘅老少組合必定會擦出唔少火花，但柴咲幸粉絲可能就會非常失望。

資料來源：女性自身