由著名建築師Bjarke Ingels所創立嘅BIG建築事務所，近日公布中國手機品牌OPPO新研發總部「O-TOWER」概念圖，大樓採用「O」字形設計，旁邊圍繞著一個充滿綠色植物嘅庭園。不過，點解睇落有啲似...《魔戒》入面嘅索倫之眼？

據了解，「O-TOWER」將會座落於由阿里巴巴及中國政府共同興建嘅杭州未來科技城，位於一個天然湖泊旁邊、佔地10,000平方米公園同城市中心之間。

「O-TOWER」最底三層將會對外開放，設有展覽廳、會議中心及餐廳等等，而高層主用嚟做辦公室。而大樓周圍將係一個種滿大量綠色植物嘅公共庭院，為城市提供新鮮空氣。另外，該項目亦有考慮到環保元素，建築師表示大樓玻璃幕牆兩則設有旋轉百葉窗，會根據太陽照射角度自動調節，能有效減少52%太陽增益（solar gain），從而減少能源消耗、眩光、反射率及光污染。

資料來源：newatlas、BIG