以極血腥殘暴畫面而聞名嘅格鬥遊戲《Mortal Kombat》自1992年推出後，一直深受歐美玩家歡迎，亦好順理成章地曾改編為真人電影——不過第一集爛蕃茄評分只有46%，第二集得分更係係2% (我冇打錯，真係單位數)，劇本、演技、特效全部被批得體無完膚，結果隻Game依家出到《11》，但電影由1997年就冇新作——直到今年先以重啟 (Reboot) 嘅方式出現！

由Warner Bros. 發行、將於今年4月上映嘅《Mortal Kombat》真人電影日前就公開咗所謂「限制級」預告，雖然預告中都算係有啲血花，但比起隻Game本身真正血肉橫飛嘅畫面，可以話係大台劇集床上戲與日本「動作電影」嘅分別，如果一心去睇血漿嘅話似乎會幾失望。

好在過去兩集為人詬病嘅特效，經過廿年之後似乎隨住技術進步而大幅提升，至少唔會感覺廉價，動作場面似乎相當唔錯；不過另一邊廂，預告一句「呢個係胎記」、「胎記係咩意思」、「胎記係生出黎就有嘅」就被外國網民係咁拎出黎笑。