由Mila Jovovich及Paul W.S. Andernson夫婦合力炮製嘅《Monster Hunter》真人版電影，可謂2020年最多Game迷期待嘅一套好戲——未必係期待套戲好睇，而係期待套戲有幾咁難睇——尤其當上次公佈條預告有槍有炮之後，大家都好想知Mil Jovovich同Paul W.S. Anderson係咪又會玩爛另一個經典遊戲。而《Monster Hunter》琴日就公佈咗條長2分幾鐘嘅新預告，大家睇完又有咩諗法呢？

呢條預告其實都已經交代咗個成個故事背景，甚至係開場部份嘅劇情。基本上就係現實世界中出現突然失蹤嘅軍人，而Mil Jovovich飾演嘅Artemis就帶領另一班軍人去調查，結果都被吸咗入「芒亨」嘅世界，然後遇上黑角龍。接下來大部份嘅篇幅似乎都係講緊呢班軍人點樣適應「芒亨」世界、尋找點到現實世界嘅方法，以及更多開槍畫面，去到尾段先見到Artemis拎出雙刀戰鬥。最後似乎就係雄火龍跟咗主角一行人回到現實世界，而Artemis就要憑自己屠龍啦。

無論係預告下嘅留言，又或者如IGN等報導之下，絕大部份網民睇完條預告都話完全唔睇好套戲，特別係對於有美國軍人出現喺「芒亨」電影中更加係極盡冷嘲熱諷，話佢一啲都冇「芒亨」嘅感覺，反而仲似Call of Duty，有人更直指唔好話買飛入場睇，就連免費Download都廢事。