日本天然災害頻繁，去過日本旅行嘅或者都有見過電視有輕微地震嘅報告，甚至可能仲經歷過一次半次 (希望大家冇經歷過嚴重嘅)，所以日本人對於天然災害嘅通報非常著重。而喺《EVA》動畫都有出現嘅「Gehirn」，就於現實中推出「特務機關NERV防災APP」。

截圖自：nerv.app

原作中嘅Gehirn係NERV嘅前身，現實中嘅日本Gehirn就係一個提供日本本土災害情報嘅機構，而佢哋推出嘅新APP就得到《EVA》授權，可以使用NERV嘅名義，叫做增加下吸引力咁。至於個APP本身嘅內容以至設計，除咗開APP會出現NERV標誌同版面比較黑之外，其實就唔算同NERV或《EVA》有關係。而防災情報就係來自日本氣象廳及大阪氣象台，當中包括地震警報及速報、海嘯警報、火山爆發警報及速報、氣象特別警報及與國民安全有關嘅其他警報，緊急情況之下更會響會震提醒用家。

個APP就只限日本本土使用，目前只有iOS版本，或者遲啲大家有機會去日本旅遊甚至長住就可以Down定看門口。