如果有「漢堡味」的香薰蠟燭，可以在家點燃「麥記」的味道，你會唔會有興趣？不過已經遲左啦，外國麥當勞（同中國及香港唔同公司！）官方創立網絡商店Golden Arches Unlimited網站近日就靜靜雞推出紀念麥當勞『足三兩』漢堡誕生50週年，一個新系列稱為「足三兩漢堡Fans俱樂部」的產品列，當中最矚目的係一套六款「足三兩」味道的香薰蠟燭，味道分別係牛肉、青瓜、蕃茄醬、芝士、洋蔥、麵包，剩睇字都一一陣陣麥味衝出來，但呢個特別的產品係官方Instagram推文加持下火速賣哂，好多麥FANS感歎搶唔到這款獨樹一幟的精油蠟燭。如果你想要，就要睇睇實官網以搶口罩的經驗上去搶下一輪麥記新滋味。

根據麥記官方新聞稿表示，為紀念「足三兩」呢個有接近50年的漢堡包，佢地係Golden Arches Unlimited網站上，推出一系列「足三兩漢堡Fans俱樂部」系列產品，當中包括這款6個一組的漢堡香薰蠟燭。當然仲有其他精品，同樣大多數已被搶購一空。

相信你同我都一樣第一眼聽到呢個產品就覺得味道好像有點嘔心，擺明玩野，但網絡上回響極大並且大家都入去搶購一空，以商品論係非常成功的市場推廣同廣告宣傳。其餘「足三兩漢堡Fans俱樂部」產品則包括情侶手套、月曆、項鍊、T恤、別針、貼紙等產品，麥當勞聲稱每項產品都係限量出售，暫時睇除左月曆外已全數銷售一空。

除外，麥當勞宣稱將會係2月26日即聽日，為表達大家對「足三兩」漢堡狂熱的崇敬，將贈送「足三兩」漢堡的大銅像給一座神秘「幸運城市」。銅像的具體大細未知，僅透露麵包上的芝麻將有實物的20倍大。相信都會係一個相當有份量的銅像，希望唔係「C朗」式整古銅像。

麥當勞係上年12月創立左Golden Arches Unlimited的網店，開始銷售各式各樣的麥記周邊商品，由雨傘、連帽T、襪到毛帽等種類繁多，而「足三兩漢堡Fans俱樂部」就係最新的一項企劃。

當然呢種係新世代最新的宣傳行鎖玩法，每位購買呢類周邊商品的消費者，都額外創造麥當勞品牌的全新曝光機會，無論是影相上傳呃LIKE、係屋企聞麥記香薰蠟燭，或者穿著麥記特色服飾上街，都係幫緊佢地賣廣告，新世化商品玩法就係商品生活化，其中一種最埋身的生活化玩法就叫「黃色經濟圈」。無錯，即將生活態度展示係消費同日常生活當中。