「遇怪魔我即刻變大個，遇見高手痛快得多」一聽到呢句經典歌詞相信你就知道係黎自《數碼暴龍》。而原來《數碼暴龍》動畫唔經唔覺由第一代開始已經推出20年，明年2020年官方宣佈將會推出大結局劇場版《數碼暴龍大冒險最後的進化絆》，入場嘅朋友小心劇情催淚過催淚彈。

如果有一直追開《數碼暴龍》嘅朋友應該都知道，第一代嘅主角們，好似八神太一、石田大和等都已經長大，就算佢地當初係「被選中嘅細路」亦都要面臨成年嘅一刻，而今次大結局劇場版故事就係講述主角們成年後將可能要與數碼暴龍們分別。單係聽到分別一詞，就知道當中一定好多感動位，相信今集除左戰鬥場面之外，焦點一定會更多投放於主角及數碼暴龍雙方多年嘅感情中。

當然，今集與往常嘅劇場版一樣會有謎之數碼精靈出現，並有機會摧毀數碼世界或現實世界，因此八神太一等人將會再次與數碼暴龍出戰，而今戰好大機會會喺佢地最後一戰，戰鬥完畢太一可能就要同亞古獸講再見了。

亞古獸一句：「太一，你長大了」相信真係會喊死唔少人。

另外，今次劇場版會再次用上「數碼暴龍」第一代嘅主題曲《Butter-Fly》(香港版：自動勝利)，令人特別傷感嘅係原唱呢首歌嘅日本歌手和田光司於2016年因癌病離世，故今次大結局選用呢首歌除左係首尾呼應之外，相信亦都係為左紀念和田光司。