睽違7年，日本人氣治癒劇《深夜食堂》正式宣佈推出第六季，而且男主角「小林薰」亦確認回歸出演，預計今天秋天就有得睇！不過大家要留意嘅係新一季唔再喺Netflix播出，而係回歸日本電視台，由MBS、TBS於「ドラマイズム」時段播出。

圖片：www.meshiya.tv

根據官方消息，今次《深夜食堂6》同樣改編自安倍夜郎在小學館《Big Comic Original》上連載緊嘅同名漫畫。呢個系列自2009年首次由小林薰主演拍成電視劇以來，就憑著獨特嘅溫暖及平靜感深得全球劇迷歡心，先後於2011及2014年推出第二及第三季，2016年起更變成Netflix原創影集，並推出《深夜食堂4》同《深夜食堂5》，在全球190個國家及地區串流播出。系列原作漫畫至今全球累計發行突破900萬部，更先後在中國、韓國翻拍。不過《深夜食堂5》已經係2019年嘅產物，過去近7年時間系列都未有再更新，今次消息對Fans黎講應該都算喜出望外啦！

圖片：www.meshiya.tv

《深夜食堂6》將搵黎原班人馬回歸製作，男主角「小林薰」亦會回歸。佢於劇集官網上撰文表示呢7年間經歷咗疫情，大家也稍為老咗，佢自己嘅白頭髮亦變得更多。對於劇集有新作佢感到非常開心，亦希望將更加精彩嘅《深夜食堂》呈獻畀大家。最後寄語：「深夜食堂，誠摯期待各位的光臨。」

《深夜食堂6》目前正在拍攝中，預計於今天秋天於MBS、TBS播出。

資料來源：www.meshiya.tv、朝日新聞