爭咩吖！溝埋一齊做PlayBOX吖笨！

文：MenClub Patrick　　圖：互聯網
POSTED ON 16 Jan 2015

「爭咩吖！溝埋一齊做瀨尿牛丸吖笨！」雖然星爺呢句19年前嘅《食神》對白，一早已經俾人講到爛，但今次呢部嘢真係完美示範嚟，唔再講多一次唔得！係乜嚟？睇名都估到啦，唔係仲要問呀話？咪就係將PlayStation 4同XBOX ONE溝埋一齊做「PlayBOX」囉，吖笨！

你話佢無聊又好、想引人注意又好、真係有用都好，呢條美國仔Eddie Zarick就係好鍾意將兩部Console改嚟改去。之前佢已經試過將PS4同notebook芒結合，改成「PlayBook」，又試過將XBOX ONE同XBOX 360結合，改成「XBOX DUO」，所以有follow開佢動向嘅話，應該都估到佢下一步就係改PlayBOX㗎喇。

Eddie唔止將兩部主機嘅零件收入一個機箱入面，仲裝埋個22吋芒上去，等部機唔使駁電視，可以直接打。除咗一啲幾礙掟又唔太重要嘅嘢外（例如USB插頭），Eddie盡量將所有裝置保留番晒，而電源線、HDMI輸出、Wi-Fi等等都係兩機共用嘅。我覺得咁樣改法，最正係慳到位，唔使擺兩大嚿嘢喺屋企。之但係睇見張拆機相，裏面啲零件逼到無可再逼咁滯，就幾質疑散唔散到熱㗎？巧驚驚喎，擔心長期戰唔OK！