「機會黎啦飛雲」呢句野相信唔少人都一定聽過，而佢係出自著名日本動畫《魔神英雄傳》入面嘅主角機體龍神丸，每當主當飛雲有機會出必殺技「登龍劍」嘅時候，龍神丸就會咁樣同飛雲講。

雖然《魔神英雄傳》非常受歡迎，但其遊戲相對較少出現，繼較早前機戰罕有加入《魔神英雄傳》嘅故事情戰，令一眾機迷可以用到龍神丸，最新消息指一隻《魔神英雄傳》嘅手機遊戲即將推出。

日本Sunrise動畫日前宣布，將會授權「KINGNET」公司開發《魔神英雄傳》嘅中文版手機遊戲，目前推出日期尚未公佈，但係大家都真係可以期待一下。

官方消息指，今次《魔神英雄傳》遊戲將會以冒險卡牌RPG模式進行，玩家將可以用上不同角色去經歷拯救創界山嘅故事。當然你將可以用上主角飛雲以及其一眾朋友，好似打電話Call魔神嘅武一朗、虎王等。

而大家都好期待嘅一眾魔神亦都會有得抽有得用，好似龍神丸嘅多個形態、戰神丸、邪虎丸、空神丸等等。

不過較為可惜嘅係，呢隻遊戲暫時預計可能只限中國地區有得玩，即係連日本及香港等地都未必有得下載，如果你真係好想試玩嘅話，到時就要諗下辦法啦。