可能重製開真人化電影玩開有條癮，繼《小魚仙》、《花木蘭》、《小飛象》、《獅子王》、《阿拉丁》等等之後，迪士尼又再宣佈會將經典作品製作成真人版搬上大銀幕，之前有傳下一部作品係《鐘樓駝俠》（The Hunchback of Notre Dame），但最近又有新講法，話下一部會改編嘅真人版電影將會係《大力士》，唔知係同步進行定點呢？不過聽講《大力士》已經諗定要搵Alexander Skarsgård做主角，成件事好似堅堅地咁喎！

《大力士》（Hercules）係迪士尼於1997年製作嘅第35部經典動畫長片，故事以希臘羅馬神話為題材，描述海格力斯（羅馬名Hercules）點樣成為英雄，不過動畫改編幅度好大，故事同角色個性與希臘羅馬神話原著非常唔同，大家都係當動畫咁睇就算，唔好諗住可以透過《大力士》認真了解神話故事。

Any肥，其實已經唔係第一次聽講迪士尼有意將《大力士》改編做真人版電影，根據《We Got This Covered》嘅報導，最近迪士尼真人化籌備作品中其中一部就係《大力士》，並且有意搵瑞典演員Alexander Skarsgård擔任主角。

不過亦有傳迪士尼其中一個主角人選係Alexander Ludwig，究竟係邊一個Alexander先係真，就真係要等官方confirm喇。

另外仲有傳呢次真人版《大力士》重點之一係，相比《美女與野獸》同《阿拉丁》，《大力士》會盡可能接近1998電影版嘅方式呈現，即係成個質感上會九十年代啲？呢種講法都幾令人期待出嚟效果究竟係點。