要想喺聯賽入面獲得好成績，金錢嘅投入可能唔一定會換黎好結果，但唔投入基本上就好難換到好成續，其中好似曼城就係當中嘅表表者。不過，其實球隊喺金錢上嘅付出，並唔一定代表球隊老闆為球隊嘅付出，以下大家可以睇到英超BIG 6入面，球隊老闆喺過去5年私底下為球隊注資左幾多。

今次講到嘅英超BIG 6分別係曼城、曼聯、車路士、熱刺、利物浦及阿仙奴，而統計係講緊球隊老闆喺過去5年個人為球隊注資左幾多金錢，亦即係佢以私人名義比錢球隊用。

而喺BIG 6入面，車路士老闆艾巴莫域治係最願意為球隊付出嘅一人，佢喺過去5年一共私底下為球隊貼左3.25億鎊，排名BIG 6老闆第一。其次嘅係曼城老闆蘇爾，佢個人為球隊注資3.02億鎊。另外，利物浦及熱刺老闆則分別為球隊分別注資9300萬鎊及4000萬鎊。

最後，唔算太令人意外嘅係曼聯及阿仙奴兩支球隊嘅老闆1蚊都無私底下拎過出黎比球隊，其中曼聯老闆格拉沙家族可以話臭名遠播，佢地只係當曼聯係賺錢工具，想佢拎錢出黎真係諗都唔使諗，相反喺曼聯身上Cap水就有！而阿仙奴方面，球會只係一味想買幼齒培養，然後高價賣出賺錢，今夏只有4000萬鎊轉會費嘅佢地真係想買人都幾難。