曼聯自從摩連奴離任，並由蘇斯克查擔任領隊後，球隊戰績一路高歌猛進，部份喺摩帥手下原本表現不佳嘅球員相繼復甦，當中中場普巴嘅表現對比可以話最大。不過，喺蘇B下手表現出色嘅普巴，日前竟然直言效力皇馬係自己嘅夢想！

較早前，施丹正式回歸皇馬執教，雙方簽約至2022年夏天，其人工及球隊話事權大幅提升，主席佩雷斯亦明刀明槍希望施丹能夠重新帶領皇馬組建王朝。

唔知係咪見同鄉傳奇施丹重掌皇馬，普巴竟然喺接受訪問時突然公開表示在施丹手下效力世界最大嘅球隊係佢嘅夢想。

「就好似我經常所講，效力皇馬係所有人嘅夢想。呢間係世界最大嘅球會之一，仲要有施丹執教，所有鍾意足球嘅呢個都係佢地嘅夢想。」

「現在我效力的是曼聯，但未來好多野講唔埋，但我而家喺曼聯則好高興。」

不過幾日有消息指，其實早喺3年前施丹已經有意收購普巴，但由於當時主席佩雷斯與普巴經理人關係並不好，所以呢單交易並無任何下文。而現在，施丹手握買人嘅最終權，所以如果佢真係想要普巴，佢絕對可以對其進行收購，更何況大家都係法國人，施丹一定好知道點樣同普巴溝通及使用佢。