《幽遊白書》作為一代經典動漫，就算早喺1994年完結，到今時今日都依舊人氣不減，Keep住推出各式各樣《幽遊白書》嘅周邊商品，而最近日本ENSKY（株式会社エンスカイ）就推出一款非常詭異嘅周邊，就係故事中被遺棄嘅「飛影BB」等身大公仔（赤ちゃん飛影ほぼ等身大ぬいぐるみ，ENSKY SHOP限定）！

飛影係《幽遊白書》主角之一，與藏馬同為由魔界嚟到人間界嘅妖怪盜賊，因為奪走魔界三寶嘅「降魔之劍」而同靈界偵探浦飯幽助展開戰鬥，結果落敗。之後小閻王就要佢同藏馬幫助幽助，以將功贖罪，後來飛影應承咗，於是就同幽助一同解決魔界至人間妖怪作惡嘅問題，並成為戰友。

不過原來飛影嘅身世相當坎坷，話說佢係冰女同火炎系妖怪生下嘅忌子，係一個一開始就不被世界期待嘅存在。飛影出世後，其他冰女就將飛影呢個不祥之子連同冰菜嘅「冰淚石」，一同由冰河之國拋棄到魔界之森。而「飛影BB」等身大公仔就以此為原型，由於出生時飛影全身環繞魔界火焰，須以符咒包成結界先可以靠近，所以「飛影BB」等身大公仔一樣有符咒包住，仲可以見到飛影BB露出魔性笑容，非常Creepy！

《幽遊白書》「飛影BB」等身大公仔（幽☆遊☆白書 赤ちゃん飛影ほぼ等身大ぬいぐるみ），尺寸約400×230×210mm，參考售價6,500円，預定2019年5月就會發售，有冇巴打都想買先？