四驅車賽　越難越愛

文：MenClub Patrick　　圖：MenClub
POSTED ON 03 Dec 2014

四驅車興番，我當然知道大家都知，有啲師兄可能已經玩咗兩、三個月添。不過，就連余文樂等潮人，其實都係開始玩咗冇耐，再睇埋家陣個勢，陸續有大型比賽舉行，相信仲會有排興，仲未撻着玩番嘅朋友，而家get ready去玩都未遲啫。況且經過早輪喪炒之後，近期因供貨漸趨穩定，車同零件嘅炒價都明顯回落，上車玩真係時候。

之但係，你仲打算只係買一、兩架車，再拉幾個friend夾錢買條普通賽道，求其搵個地方放車自high嘅話，咁就實在太out喇。而家好多車友已經愈玩愈專業，隨手都攞得出幾架戰車，改裝費郁啲都過千，更加鍾意四圍蒲唔同嘅四驅車場，搵人挑機鬥快兼留名。唔少車場為咗滿足呢班車友嘅挑戰心態，都將大型賽道改到勁高難度，跟住班車友又再研究點樣改裝去克服難關，形成一場又一場改裝競賽。今次筆者就走訪咗車場GoNature 4WD Arena，同埋去過港九新界多個車場留低腳毛嘅「鞋頭四驅」車友，為大家講講而家嘅賽道同改裝興點玩法。
夜晚經常有二、三十人去GoNature 4WD Arena玩車，坐滿晒啲改車枱。
賽道篇組裝賽道加難關位於觀塘工廈內嘅GoNature 4WD Arena，喺9月開業，負責人豬仔話當時全港只大約有十幾間四驅車場，但唔夠三個月，現時已經開到七十幾間。佢又指車友玩同一條賽道玩得耐會好悶，所以佢大約一個月就會改一次條賽道，而家條大約130米長嘅三軌賽道，係用一條原裝雙星賽道，再加其他大陸廠賽道嘅組件合併而成。豬仔仲話嚟佢個車場玩嘅車友，唔少都玩壓咗普通賽軌，所以佢會加入自己設計嘅難關，等啲車友有得諗計改車去克服，咁先至玩得過癮。目前佢仲自製緊一條五軌賽道，不過未有成品睇之前，先請佢講解吓而家呢條技術軌有咩難過位。
4大難關 1. 拱橋成條賽道有三、四個拱橋形狀嘅上波落波位，架車一快，過橋嗰陣一定會成架車拋起，穩定性唔夠高的話，好易飛出賽軌。
2. 跳台直頭令架車凌空跳起，不過個窿唔算大，一般車速實跳得過，唯一要擔心係架車喺空中時偏左或偏右，落地嗰陣撞埋去賽軌條邊，然後再彈出賽道。
3. 大斜台豬仔特登搭建一個約70度嘅大斜台，將部分賽道放上去，等啲車要爬上高山繼續作賽。呢關最考摩打夠唔夠力，車速唔夠嘅話，隨時成架車停咗喺度，game over。
4. 蛇彎不過，豬仔話最多車其實係死喺一連串嘅蛇仔彎。啲彎仔睇落好似冇乜嘢，但架車左撞右撞，若然側輪唔夠順滑，一樣好易撞到架車翻起再飛出街。尤其相中呢條蛇彎係啱啱上完斜，架車有少少離地，再撞一撞，唔夠定即飛。
GoNature 4WD Arena負責人豬仔
GoNature 4WD Arena 地址：觀塘興業街14號永興工業大廈地下C2室開放時間：02:00pm-01:00am（星期一至五）　　　　　11:00am-11:00pm（星期六、日及公眾假期）收費：每小時$20-$30（$100全日任玩）查詢：www.facebook.com/GN.MINI4WD.ARENA
而家車友落車場鬥車，多數係單獨跑時間鬥快，好少再兩、三架車一齊鬥。就以GoNature 4WD Arena條約130米嘅三軌賽道為例，30秒走完返到起點，已經算非常快。落場玩車玩成晚，好多車友會用絕大部分時間嚟改車，真正放車時間可能只得十幾分鐘，但係玩四驅嘅最大樂趣，其實就係改車。早排雙星原裝零件被喪炒，好多本來只值幾十蚊嘅零件，都被炒到過百蚊，仲可能想買都買唔到。好多車友除咗有幾架戰車，仲有大箱零件跟身去車場玩車同改車。
改車篇先求穩定再求速度面對GoNature 4WD Arena呢類加強咗難度嘅技術軌，「鞋頭四驅」車會嘅車友阿澤話，其實而家玩四驅車，首要係車嘅穩定性，同我哋細個亂咁玩嗰陣一味貪快唔同。比賽最緊要係走完全程，今時今日啲賽道進步咗咁多，多咗好多跳躍位、上落斜坡同彎位，走走吓飛咗出街，再快都冇用。之前有啲車友為求做到穩定呢點，會故意將架車改到比原本重身，不過阿澤話而家已經唔興咁做，想穩定係應該針對賽道嘅特點，加裝適合嘅配件。因為鬥車始終講求快，加重咗車身，去到直路嗰時就會蝕輸畀人。咁到底揀咩車好，又有咩零件係一定要裝？聽聽阿澤點講！
「鞋頭四驅」阿澤
6大改裝心得 1. 新手啱玩中置車廿幾年前四驅車只有後置摩打同前置摩打兩款底盤，而家再多咗中置底盤，不過鬥車通常都係用後置或中置兩款。阿澤話因為後置摩打嘅車會比較快，所以要改到佢哋好穩定，係會難啲，需要較高嘅技術，同埋更多嘅配件。相比之下，中置車款嘅穩定性本身就高啲，易啲改裝，亦唔使買咁多配件，比較啱新手玩。但係因中置摩打要同時推動前後4個轆，阻力大啲，車速難免會慢啲。中置摩打底盤後置摩打底盤
2. 精挑側輪、平衡桿阿澤話車頭車尾嘅側輪，差唔多係穩定成架車嘅關鍵，但係跟車送嗰啲膠側輪，又細個又唔夠順滑，一定要換啲合適嘅！而家好興用中間有啤令嘅金屬輪，size可以用到19mm咁大。平衡桿（波棍）就要視乎賽道嘅彎位特性，去揀長度同裝幾多支，甚至可以喺桿上加裝厚身大膠轆，再喺上面黐埋膠紙，等架車轉彎嗰陣膠轆能夠啜實軌邊，減低車身飛起機會。
3. 必裝龍頭鳳尾我哋細個玩車嗰陣已好鍾意裝龍頭鳳尾，但多數只係為咗裝飾，不過今時今日玩車係有實際需要嘅，事關裝咗先會夠窿加裝大側輪同平衡桿。阿澤推介用碳纖維製嘅龍頭鳳尾，雖然比膠製重身少少，但硬度強得多，值得用。嫌原裝對bumper阻掟嘅話，不妨拆咗去，直接用螺絲裝上龍頭鳳尾。喺車頭bumper下面，仲可以剪爛條軚貼上去，或者黐張膠紙上去做brake，等架車跳躍完落地嗰陣有得靠佢減速，保持車身穩定。
4. 揀扭力強摩打而家啲咁高難度嘅賽道，已唔能夠一味用高轉速嘅摩打去走，反而更加應該注意摩打嘅扭力，用扭力強嘅摩打，架車先會夠力上斜同跳躍。摩打包裝上面有列出扭力數據，20g/cm算係大扭力款式。
5. 可改成提殼針對跳台同拱撟多嘅賽道，阿澤話可以用車殼打得開嘅提殼設計，令架車喺半空上面更加平衡同穩定。同時，車殼同底盤亦可以盡量偷空，減輕車身重量，等架車行得更快。
6. 磨薄車軚阿澤話當4條軚磨薄咗之後，車嘅重心就會低啲，令車更加貼地，唔止平路會行得定啲，轉彎時亦冇咁易被拋起，跳躍完落地嗰陣，亦能夠立即用番高速繼續行走。不過部磨軚機要千幾蚊一部，未必人人有。
車友一句 Terrace 「鞋頭四驅」另一位成員Terrace比阿澤更狂熱，四驅潮復興呢三個月，已經用咗超過兩萬蚊去買車同買零件，使咁多錢係因為好多嘢都係捱炒價買。佢話同佢一齊玩車班人，大部分都係30歲左右、當年迷過《四驅小子》（唔係隔咗十幾年嘅《四驅兄弟》）。而家佢哋車會嘅成員，每個禮拜都會聚埋一齊玩車，去唔同車場挑戰各種賽道，或者同其他車會切磋交流。
Crystal 初時只係跟朋友去四驅車場睇吓、睇睇吓自己玩埋一份嘅Crystal，當年就冇睇過《四驅小子》同《四驅兄弟》喇，不過而家差唔多每星期都會去放車。佢由開頭乜都唔識，到而家起碼知道龍頭鳳尾同側輪有咩作用，仲識自己郁手簡單改車，所以唔好話四驅車一定係男人嘅玩意呀。
余文樂都係近呢個幾月先開始喺Instagram po四驅車相，算遲起步，不過每隔幾日就有新相出，放車放得咁密，好迷吓，仲有人見過佢親自落旺角買車添。