1. 得閒死唔得閒病仲瞓？搏炒？

你越係得閒死唔得閒病，你就越需要瞓個晏覺。外國歷年來有多個研究指出，人的專注力和生產力會隨住清醒時間越長而越低。即係話你上晝用半個鐘搞掂嘅嘢，如果放喺下晝做就可能要花更長時間。2001年有研究指出「疲倦」所造成的經濟損失達到180億美元！事實上有好多外國企業(例如FB、Google、甚至小米)的辦公室都設有休息區，等員工可以眠一眠。所以當你覺得自己做嘢越黎越慢，你最需要嘅就係一個恰到好處嘅晏覺，Boot機再黎過！

2. 瞓咗咪仲難起身！

部份正確，但大家仲記唔記得自己仲係學生嘅年代，上堂上到好眼瞓，終於頂唔住瞓著咗然後好快就畀阿Sir拍醒，突然就覺得自己重獲新生咁？關鍵就在於你瞓咗幾耐！

睡眠可以簡單分為三個層次：似睡半醒、淺睡、深睡，正常人大概需要30分鐘就會進入深睡。但進入深睡之後就會很難一下子被叫醒，呢種由深層睡眠把你拉出來的痛苦先係你瞓完仲勀嘅原因。所以晏覺唔使長，15-20分鐘的淺睡一樣可以幫你提高專注力！

3. 飲咖啡咪得囉！

好多人都會靠咖啡、可樂和Redbull等提神飲品幫自己「吊命」。當然咖啡因的確可以幫你提神，但由你吸入咖啡因到它產生提神作用，大概要花30分鐘，咁你話呢半個鐘用黎做咩好？緊係用黎瞓晏覺最好！因為當你享受咗半個鐘淺睡，同時加上咖啡因的作用，咁你醒嗰陣咪有雙重功效！呢種就叫Nappucinno！

4. 瞓唔著喎！咁點呀！

明嘅！尤其是當你前一秒都仲忙到出哂煙，下一秒就要你瞓嘅難度真係好高。但有時「瞓」呢家嘢又唔使一定話「瞓著」嘅，「瞓低」其實都夠架啦！根據研究睡眠多年的Sara Mednick博士，好多人其實係瞓著咗而自己唔知！換言之瞓下又冇壞嘅！

5. 講到咁，咁幾時瞓係最好時機？

當然實際上咩時候瞓就要因人而異，但Mednick博士就早上起身後六小時是最好嘅瞓晏覺時機。根據人嘅生理時鐘，呢個時候你的核心體溫會係最低，個人反應亦係最慢，所以就最啱瞓覺豬！如果你朝早8點起身，六個鐘之後即係兩點，食飽飯加飯氣攻心，瞓啦！