【生涯最佳】「火箭」擊敗梅菲奪今季第5個排名賽冠軍！

文：MenClub 波特先生　　圖：互聯網
POSTED ON 26 Mar 2018

「火箭」奧蘇利雲雖然已經42歲，理論上如果喺其他運動嘅話應該都已經係退休之齡，但如今嘅佢喺桌球界卻係神一般嘅存在，甚至可以形容佢嘅技術已經達到爐火純青嘅境界。而近日舉行嘅球員錦標賽，「火箭」就成功報番上年11月冠中冠賽決賽嘅一戰之仇，成功擊敗梅菲，奪得今季第5個排名賽冠軍。

今季喺球員錦標賽前，「火箭」已經成功奪得4項排名賽錦標，生涯累積奪得32項排名賽錦標，排名歷史第二位，僅落後傳奇球手亨特利嘅36個冠軍。

經過四強同桌林普(Judd Trump)嘅激戰，「火箭」生涯首次打入球員錦標賽嘅決賽，對手係上年擊敗過自己嘅梅菲。不過打入賽事決賽嘅「火箭」狀態非常出色，好快就入局，基本上無乜比過機會對手。決賽係以19局10勝制去分勝負，「火箭」一黎已經領先局數3:1，其後小休後就再領先至6:2。雖然梅菲之後力追，並曾追至局數4:7，但係「火箭」成功調整，並連贏3局，最終以局數10:4擊敗對手，奪得賽事冠軍。

成功擊敗梅菲後，「火箭」今季累積已經贏左5個排名賽冠軍，除左球員錦標賽外，另外4個排名賽冠軍分別係英格蘭公開賽、上海大師賽、英國錦標賽及世界格蘭披治大賽，單季奪得5個排名賽冠軍亦係「火箭」生涯首次。同時，佢生涯奪得嘅排名賽冠軍亦增加至33個，距離亨特利嘅紀錄只係差3個，以佢嘅狀態要超越呢個紀錄機會非常大！