皇馬未來天王 - 阿辛斯奧

文：MenClub 波特先生　　圖：互聯網
POSTED ON 04 Sep 2017

如果講現今最出色嘅足球員，相信大家都會認為係美斯或者係C朗拿度。不過，如果講現今最受關注而又最多人看好嘅球員，相信就必定係C朗皇馬嘅隊友 - 阿辛斯奧。

如今阿辛斯奧呢個名已經喺足球圈入面為人所認識，佢甚至已經被認定為未來金球獎嘅得主，佢嘅成名可以話黎到非常快，其中唔少人都仲未好認識佢。

阿辛斯奧(Marco Asensio)於1996年1月21日喺西班牙出生，現年只有21歲，其身高為1.8米，主踢進攻中場或翼鋒。阿辛斯奧7歲就已經加入西班牙球隊Platges de Calvia接受青訓，然後2006年轉至馬略卡繼續青訓，訓練時間長達7年。直至2013年阿辛斯奧正式簽約成為職業球員，並首先隨馬略卡B隊出戰。不過好快，阿辛斯奧已經被教練賞識升上一隊。

升上馬略卡一隊短短效力一年之後，阿辛斯奧就已經被皇馬相中，並以390萬歐元轉會費與銀河艦隊簽約6年。雖然成功簽下阿辛斯奧，但係皇馬並無立刻重用佢，而係將佢重新借番馬略卡一年，然後又將佢借至愛斯賓奴一年。喺皇馬領隊施丹重用年輕人嘅情況下，2016年夏天皇馬正式收回阿辛斯奧，能傳擅射嘅佢立刻得到施丹嘅歡心。

2016-17球季喺阿辛斯奧真正為皇馬效力嘅第一季，雖然佢未係球隊穩定嘅正選球員，但係卻係輪換陣容入面不可缺少嘅一員，最終全季各項比賽合共上陣38場攻入10球，表現可圈可點。

本來皇馬中前場人材濟濟，阿辛斯奧需面臨激烈嘅競爭，但係今季季前皇馬送走左中場嘅占士洛迪古斯同莫拉達，變相令阿辛斯奧將分得更多嘅上場時間。而就係新球季第一個主要錦標西班牙超級盃入面，阿辛斯奧就震驚全世界，因為佢連續兩場面對巴塞都轟入世界波，表現獲得一致讚賞。

而黎到西甲聯賽，皇馬並未好快進入狀態，其中面對華倫西亞嘅比賽更加只係以2：2踢成平手，唯獨阿辛斯奧嘅表現獲得正面評價，其狀態係目前皇馬陣中最好的。新球季至今，阿辛斯奧一共為皇馬上陣左5場比賽，但係已經攻入左4球，其入球能力甚至都要比賓施馬同巴利更加好。

對於呢位小將，作為球隊老大哥嘅C朗拿度更加係有讚無彈，佢認為阿辛斯奧未來將好大機會獲得金球獎，係球壇目前最具潛力嘅年輕球員之一。如果阿辛斯奧能夠繼續長期保持咁好嘅狀態，相信不久嘅將來佢將會成為皇馬嘅頭號球星，獲得金球獎絕對指日可待。