【靠樣食飯】大陸肯德基引入臉容支付笑住叫雞

文：MenClub 路兒　　圖：互聯網
POSTED ON 04 Sep 2017

笑一笑，唔止令世界更美妙，仲可以叫埋雞添，講緊KFC啲家鄉雞。大陸杭州肯德基KPRO分店近日引入一套臉容支付技術「刷臉支付」，叫完雞之後對住系統鏡頭笑一笑就可以畀錢。唔止「做雞」，叫雞都一樣有好多種方法。

呢套「刷臉支付」系統由百勝中國（Yum China）與阿里巴巴旗下的支付寶合作開發。部機同依家香港麥當勞嘅自助點餐機有啲相似，顧客可以先透過屏幕點餐，之後企定定等3D鏡頭掃描自己個樣，笑一下影張相。

系統只需一至兩秒完成臉容比對，其後會連接至支付寶系統，顧客再輸入埋手機號碼認證身份，就完成整個交易啦。簡而言之，就好似將手機臉容辦識放大做一部大機器咁，再連接支付寶畀錢，不過家陣連手機都唔使拎出嚟。

技術人員強調，系統配備3D鏡頭及實時掃描算式，防止有人嘗試用相片或影片出蠱惑，盜用他人帳戶。用戶亦可以隨時關閉「刷臉支付」功能，保障安全。

今次唔係第一次大陸試用臉容支付技術，2015年百勝中國於上海亦曾經引入相關技術到餐廳試驗。今回就同肯德基KPRO合作，呢間餐廳同一般肯德基唔同，走健康路線，冇炸雞得烤雞，亦會供應鮮榨果汁、咖啡同手工啤等等。