如果大家有聽過JB嘅《點解咁__肥》，就會知道歌詞中問咗兩次「點解咁__肥」之後，畀出嘅答案係「食嘢求__其」同「食嘢亂咁黎」。而根據美國杜克大學近日公佈嘅大型跨國研究，就證明JB其實真係講得啱：做唔做運動唔係肥嘅主因，食啲咩落肚先係！

眾所週知唔少發達國家都面對住肥胖人口嘅問題，而過去唔少研究都將其原因歸咎於發達國家嘅人活動量下跌，熱量消耗不足。不過根據杜克大學Pontzer實驗室近日公佈嘅研究，於收集並分析4,200名年齡屆乎18至60歲、來自六大洲共34個國家或族群嘅人嘅生活習慣以及身體數據之後，發現發達國家嘅人嘅熱量消耗，其實不比以農業，甚至遊牧、狩獵等生活方式為主嘅人少，有時甚至會更高。換言發達國家嘅人唔係因為活動量唔夠先至肥。

研究進一步發現，「熱量消耗」作為一個變數，只能少部份解釋體脂累積（即係肥）呢個結果。換言之如「飲食習慣」等其他原因，先係影響肥唔肥嘅主要。再講白啲即係：發達國家嘅人唔係因為活動量不足所以肥，係因為唔健康嘅飲食習慣先肥。

值得留意嘅係，研究人員強調呢個結果唔係證明「減肥唔使運動」，而係支持近年興起嘅「飲食與運動同樣重要」共識，兩者應該被視為控制體重嘅互補元素，而非替代品。未來嘅研究則會進一步探討發達國家嘅邊類型飲食習慣會導致肥胖。

資料來源：Energy expenditure and obesity across the economic spectrum