雖然依家好流行講咩「Z世代」，但其實「Z世代」指嘅係1997年至2012年出生，即係依家13至28歲嘅人，由中學未畢業到出黎做嘢好幾年嘅人都包含在內。但即使面對咁多Z世代嘅競爭，今晚要介紹呢位「黒江こはる」，依然被譽為日本寫真界嘅「Z世代新星」，可見佢一定有獨到之處！

黎緊9月就20歲嘅「黒江こはる」早於小學二年級時就於家鄉福岡開始藝能活動，後來加入地下偶像團體「ハラ塾DREAMMATE」開始偶像活動，小學六年級時更曾經於日本著名媒體Model Press及直播平台Showroom合辦嘅徵選比賽中獲得過月間冠軍，後來再成為著名少女時尚雜誌《Popteen》嘅模特兒。2022年滿17歲時參加女高中生選美比賽「女子高生ミスコン」嘅準優勝（亞軍），同年再出演捧紅過N個年輕女星嘅Abema TV戀愛綜藝《今日、好きになりました。》蘇梅島篇，令其人氣再進一步。由此可見佢嘅藝能發展一直都順風順水，近年踏足寫真界後自然亦掀起話題。

不過你唔好睇佢生得眼大大、乖巧玲瓏咁，就以為佢係個溫柔軟弱嘅小女子。事實上佢嘅愛好非常「男人」，唔單止鐘意高爾夫球、釣魚、棒球以及睇格鬥比賽，近來最大嘅愛好更係揸電單車，而且係台灣稱為「重機」、香港地叫「啡令」嘅高性能電單車，社交平台上亦不時見到佢全副武裝出車嘅英姿。你話佢人靚身材好，興趣又吸引到班麻甩佬，點會唔紅呢？

IG：koharun_0586_