日本女團AKB曾經培養出唔少靚女，好多人退團之後人氣依然高漲。好似今晚要介紹嘅「永尾まりや」咁，退團之後一直憑性感寫真累積人氣，受歡迎程度分分鐘畀佢做女團時更高。但即使有著咁深厚嘅背景、極受男性喜愛嘅身材外貌，佢早排去參加戀愛綜藝時卻差啲第一集就被Foul走！

下個月就滿32歲嘅「永尾まりや」於2009年加入AKB，並一直以團內中堅份子身份活躍到2016年，今年正正就係佢單飛十週年紀念。單飛後嘅佢尺度大解放，唔單止頻頻為各大雜誌拍攝水著寫真，更平均兩年就出一本實體寫真集，憑住女團出身嘅反差感，以及本身就不俗嘅身材外貌圈粉無數，人氣節節上升。亦因為佢又靚又正又受歡迎，所以ABEMA TV早前先會搵佢參加戀愛綜藝《Love Power Kingdom 2》。

《Love Power Kingdom 2》搵黎16位人生贏家俊男美女戀愛高手，透過各種親密活動互相了解，然後再互相投票選出當中嘅「最モテ」（最受觀迎）男女。節目內會不斷公佈最新排名，排名最低嘅參加者就要被淘汰，所以非常考驗參加者能否用個人魅力冧掂異性參加者。不過唔好以為「永尾まりや」有女團背景又係寫真女星就好有優勢，事關其他女參加者如「林ゆめ」、「川瀬もえ」、「聖菜」、「木村葉月」等都係寫真女星。事實上雖然「永尾まりや」於初次印象中獲得第一名，但第一集嘅投票中就已經跌到共同包尾，差啲就被淘汰。，難怪佢自己都話參加戀綜緊張過AKB總選啦！

IG：mariyagi_san