據《Bloomberg》記者Mark Gurman報導，Apple計劃於今年秋季推出首款OLED觸控螢幕MacBook Pro。呢部新機只單止個Mon有得篤，仲會最新一代M6晶片，並且引入類似iPhone「動態島（Dynamic Island）」設計。

報導引述消息指，呢款全新MacBook Pro提供14吋及16吋兩種螢幕尺寸可選，外觀設計同現有機型差唔多，唔會有太大改動。最大分別在於個螢幕支援觸控功能，意味以後用家操作MacBook，唔使再單靠觸控板同滑鼠，仲可以直接伸隻手指去「篤」個Mon。除此之外，Apple亦會更新macOS令系統更適合觸控操作，例如當用家用手指點擊或輕觸螢幕時，指尖周圍會彈出一個選單，提供相關操作嘅選項。與此同時，亦具備同iPhone及iPad相同嘅手勢操作，例如透過兩隻手指放大縮小、快速捲動等。

除咗加入觸控螢幕，新機另一大賣點就係引入類似iPhone嘅「動態島」設計。呢個改動預計會令原本死板嘅「M字額」變得更有互動性，可以顯示通知同即時資訊。再配合埋傳聞中效能再升級嘅M6晶片，Apple似乎想透過軟硬體大革新，吸引一眾還在觀望嘅舊機主換機。

值得一提嘅係，呢個消息一出，唔少資深果粉都擔心教主Steve Jobs會唔會「激到彈起」。事關Steve Jobs生前曾明言「觸控面唔適合垂直放置（touch surfaces don’t want to be vertical）」，直指呢種設計展示時睇落好cool，但篤多幾次就會感到酸痛，時間再長啲嘅話，手臂簡直攰到要斷咁。佢認為呢種設計係行唔通（doesn't work）兼極其不符合人體工學，觸控面應該係要水平咁用，所以佢哋先會花咁多年去完善MacBook嘅觸控板。