世界之大無奇不有，巴勒斯坦一名男子因恐怖主義活動被判15年有期徒刑，但坐監期間，在外嘅太太卻連生4胎。據該名男子所講，佢係透過零食包裝袋偷運「種子」出獄，令太太能夠進行人工受孕...

（圖片截自：youtube@palwatch）

據外媒《DailyStar》報導，巴勒斯坦男子Rafat Al-Qarawi於2006年因從事恐怖主義活動被判15年有期徒刑，直到上年3月獲釋。佢日前接受以色列NGO「Palestinian Media Watch」訪問時就透露，由於囚犯能夠喺監獄內購買糖果、曲奇餅、果汁之類等零食，並喺探監期間將5樣物品放入一個袋交畀屋企人。囚犯們會喺獄警叫到自己個名之前，秒速將精液射入零食包裝袋，再透過專業手法重新密封及加上標記交到太太手中。當囚犯太太們拎到精子後，就會馬上前往醫院進行人工受孕。

由於精子離開人體後只有30-60分鐘存活時間，所以唔少人質疑呢個方法嘅真實性，但據「Palestinian Media Watch」所講，除咗Rafat Al-Qarawi之外，當地已經有101名小朋友係透過呢種方法出世。