香港一向機會處處，唔只樓、演唱會飛、月餅可以炒，就連颱風「山竹」襲港都可以炒高膠紙售價，而每年嘅新iPhone開售更成為咗「果農」嘅年度盛事。Apple新推出嘅iPhone Xs及iPhone Xs Max今日正式喺香港開賣，喺朝早基本上大部分顏色、型號都有炒賣「水位」，不過嚟到下午除咗512GB嘅iPhone Xs Max之外，所有款iPhone都嚟個「單日轉向」跌穿IPO價位。

先講講今朝嘅交易現場先，部分Apple Store門外都有大陸人收機，普遍開價都係多2、300蚊左右，不過今年就多咗一啲嚟自南亞甚至係歐洲人收機，而佢哋係以美金進行交易，加上回收價遍低，交易的話分分鐘蝕埋匯率。回收價方面，大機iPhone Xs Max基本上所有型號都企喺原價之上，而512GB iPhone Xs Max個回收價達13000元，即至少每部賺至少500元，佢亦已經係賺最多嘅iPhone。

同時，喺早上先達仲未有開晒門嘅時候，已經有一大批iPhone「後門貨」到達，加上先達場內人流極少，對比幾年前iPhone炒風盛行時可以話係非常冷清。

嚟到下午，基本上所有顏色、型號iPhone Xs都已經跌穿IPO價位，除咗一支獨秀嘅512GB iPhone Xs Max回收價仍企穩喺13000元。不過下晝有消息傳出又一城及沙田Apple Store有所有顏色、型號iPhone現貨發售，而有電器零售店都以原價發售iPhone。所以如果仲有AOS貨又Cut唔切嘅你，就要好好考慮下自用喇，而仲Cut到嘅就快啲去Cut。

雖然新iPhone炒風低迷，不過另一邊廂港股恒生指數單日升咗475.91點，而且成交額高達1306億，唔知係咪大家都唔睇好iPhone，將資金轉移焦點去港股市場呢。