全球大部份國家都禁止象牙貿易，唔少地區或國家雖已訂立相關法例，但象牙製品依然賣極都有。理由係：「哦！嗰啲係存貨啫，賣晒就冇㗎喇！」點知，賣極都有，可能真係因為呢類產品去貨慢，存貨有排都未賣得晒，啩！ 

日本方面，所有喺1989年之前進口嘅象牙均屬合法，之後已禁止有關產品輸入。

不過，日本人常用嘅私人印章，原來有唔少都係以象牙製造，喺日本網購網站樂天（Rakuten）可以輕易買到。 

樂天最近已宣布停售同象牙有關嘅製品，預計需時一至兩個月先可以將有關產品全部下架。

Yahoo Japan採取嘅態度就好唔同，佢哋嘅發言人認為呢類產品嘅原料（即象牙），受到日本政府監管，而且日本象牙貿易唔唔對非洲大象數量構成任何影響，外界亦應明白國與國之間存在文化差異。