全屏幕手機睇到悶？咁呢部機就啱你喇！BlackBerry將會喺7月底於香港及澳門推出最新手機BlackBerry KEY2，KEY2保留咗BlackBerry最具代表性嘅實體鍵盤，亦首次加入1200萬像素後置雙鏡頭，最重要係手機電池續航力長達兩日，咁就唔洗帶住尿袋出街。KEY2備有黑、銀兩色，建議零售價為港幣5,688元。

BlackBerry KEY2今日正式喺香港發布，作為KEY2最大特點嘅鍵盤，比上一代KEYone嘅鍵盤面積大咗20%，以全新啞光鍵盤及FRET設計，改善咗鍵盤按鈕間距，而鍵盤內仲設有指紋辨識。KEY2鍵盤仲引入咗全新「全域快速鍵」，用家可以唔洗返回主屏幕，只要撳咗「全域快速鍵」就可以切换應用程式，而運用快速鍵仲可以自定52個捷徑。

BlackBerry KEY2嘅電池續航力長達兩日，配備6GB記憶體及64GB或128GB容量選擇，成為歷來最先進嘅BlackBerry智能手機。而KEY2採用咗高通Snapdragon 660處理器，仲添加咗全新「智能電池體驗」功能，可以熟習用家日常充電習慣，建議幾時需要充電，確保用戶有足夠嘅電力。

KEY2係首款引入雙後置式鏡頭嘅BlackBerry智能手機，1200萬像素嘅雙鏡頭增強自動白平衡表現，亦引入咗新拍攝模式，例如「人像模式」及「光學超級變焦」功能。另外，KEY2結合咗Google Lens功能，用家可以更輕易快捷搜尋獲取更多資訊，例如拍攝某景點就可以知道景點介紹及其他資訊。

BlackBerry Mobile東南亞及香港總經理Damian自己親身用過呢部BlackBerry KEY2，佢對於KEY2嘅拍攝功能有高度讚揚，尤其是「人像模式」製造嘅景深效果，感覺似用緊專業手機拍攝；而加入「全域快速鍵」嘅鍵盤，可以節省轉換App嘅時間。最特別嘅係KEY2可以吸引唔少人嘅興趣同目光，因為KEY2與一般智能手機唔同，仍然保留咗實體鍵盤，令人有種「You must be somebody」嘅感覺。