香港喺的士、巴士嘅發展步伐真係好可以再快啲，其他嗰啲唔講嘞，因為愈講愈冇心機。 

最近，全新倫敦的士終於面世，8月1日喺英國發售，10月起試行營運，今年年底前開始交車。預計2020年底前，將有9000部TX投入服務。

全新嘅倫敦的士，稱為TX，採用電力驅動，但車上卻又有一副1.3公升嘅電油引擎，摩打電力來自引擎；換言之，引擎唔會直接驅動車輪，而係以一個相對穩定嘅轉速運轉，作用就好似一部發電機，為電池充電，驅動摩打。

TX由London Taxi Company發展及製造，公司由中國吉利（Geely）擁有，吉利亦係瑞典富豪（Volvo）嘅母公司。 

London Taxi Company將於稍後公布TX嘅詳細機械規格，佢係入滿油之後，每缸可以連續行駛約400英哩，即約643km。TX亦可以喺純電動模式下，連續行駛70km。充電時間方面，以特製快速充電器，20分鐘搞掂；一般快速充電機呢？約兩小時；如果家庭三腳慢速，約需8至10小時。

廠方表明TX係講求襟用又捱得嘅汽車，用15至20年係閒事，所以測試時，特別將原型車運到美國阿里桑那嘅炎熱地帶，同極寒冷嘅北極圈地區。 

嗱！雖然個心都係忍唔住會話：「中國的會爆炸！」但中國公司接咗倫敦的士呢壇大嘢，都希望佢哋生生性性，唔好影衰中國人。