過去好多兩性擇偶研究都指出，「溫暖感」及「可信」係理想伴侶嘅最重要條件，但你有知唔知道應該用咩方法展現呢兩個特質，先可以吸引到女性？近日一個中國嘅研究就發現，比起用口講甜言蜜語，女性更偏好用做家務、煮餐飯黎表達愛意嘅男人。換言之愛呢家嘢唔係靠「講」，係靠「做」㗎！

圖片：ImageFX

卻說來自重慶西南大學嘅「Xing Shu」及「Jianmin Zeng」為咗了解日常小動作對擇偶行為嘅影響，所以搵黎超過500名異性戀成年人進行咗一系列實驗。第一個實驗中，參加者被要求先幻想兩個分別用甜言蜜語、又或幫手洗衫等日常小動作表達愛意嘅異性，隨後就要為呢兩種行為嘅吸引度。第二及第三個實驗就向參加者展示兩個虛構嘅人物介紹，一個擅於甜言蜜語，一個擅於甜蜜行動，參加者要從中選出一個佢哋更希望發展浪漫關係嘅人。

結果就發現，女性於三個實驗中，都傾向選擇用甜蜜行動表達愛意嘅異性，而男性就無明顯偏好。同時研究亦發現女性認為用甜蜜行動表達愛意嘅異性更有「溫暖感」及「可信」嘅特質。換言之，甜蜜行動令女性覺得你更溫暖及可信，於是更偏好與你開始長期關係。

圖片：ImageFX

研究指出，以進化論嘅角度而言，女性嘅理想伴侶係一個有能力、意圖去照顧、保護佢及下一代嘅男性，所以特別著重「溫暖感」及「可信」等特質，同時亦對展露呢類特質嘅行動更加敏感。換言之，就即係女性嘅天性話佢哋知，甜言蜜語可以齋講唔做，但甜蜜行動做咗就係做咗，所以就更加實際地偏好甜蜜行動。反之男性就無相應嘅考慮，甜言蜜語對我哋黎講亦係直接及容易理解嘅獎賞，所以就唔會有特別偏好。

資料來源：Who Favor Sweet Actions over Sweet Words More – Females or Males?