兩性研究中有個專有名詞叫「高潮差距（Orgasm Gap）」，主要係用黎形容一段異性戀關係中，男性於性愛中達到高潮嘅比率（大致接近100%），通常都遠高於女性（大約50-60%）。但有其他研究就發現，女女關係之中，女性達到高潮嘅比率可以高達86%。換言之「高潮差距」嘅癥結似乎係出喺「男性」身上。咁究竟點解女女關係嘅高潮率會更高？各位男性又能否從中學習到幫助女伴嘅知識呢？

美國Rutgers大學社會心理學系博士生Grace Wetzel就試圖了解固中原因。佢與佢嘅團隊分別進行咗兩個調查。第一個調查搵黎476名異性戀（59.5%）及同性戀（40.5%）女性，並要求佢哋透過問卷回應最近一次性愛、或與最近一位性伴侶嘅性愛經歷。結果發現，雖然異性戀或同性戀女性對於高潮嘅重視程度相近，但相比起異性戀者，同性戀女性對於達到高潮嘅期望，以及主動追求高潮嘅動力會更高，結果就係性愛中佢哋會有更多陰蒂刺激，高潮率亦會比異性戀者高。換言之對於高潮嘅期望及主動追求高潮嘅動力，與女性獲得更多高潮係有正相關。

而第二個研究，就搵黎481名順性別（則生理、心理都係女性）嘅雙性戀人士，並隨機給予一個與女性或男性約會到發生性關係嘅場景。結果發現對象係女性時，受訪者對於陰蒂刺激以及達到高潮嘅期望都會更高。換言之伴侶嘅性別，與女性對於性行為過程及結果嘅期望有相關。

研究團隊總結，女性心中往往會有個「與男性做愛就係會少啲陰蒂刺激、不會太重視女性滿足」嘅「性愛劇本」，而呢個「劇本」又與女性對性愛過程及結果嘅期望相關，從而真係影響到女性嘅高潮比率。研究團隊建議，異性戀女性及男伴要做嘅，其實就係打破呢個「性愛劇本」，例如與性愛中加入更多女性陰蒂刺激，以滿足雙方為目標，就可以改善所謂嘅「高潮差距」。

資料來源：The Role of Partner Gender: How Sexual Expectations Shape the Pursuit of an Orgasm Goal for Heterosexual, Lesbian, and Bisexual Women