隨住AI越黎越普及而且能做到嘅嘢越黎越多，亦引起大眾以至政府有當局對於AI發展嘅規管。好似歐洲歐盟委員近來就宣佈，會就Google以新聞網站內容及 YouTube 影片訓練 AI 模型一事，正式展開反壟斷調查。焦點集中於Google有無向內容提供者付出「合理賠償」，又或者起碼俾對方有「拒絕被用來訓練」嘅選擇權。

歐盟競爭事務主管 Teresa Ribera 表示，委員會擔心 Google 可能利用其搜尋引擎嘅主導地位，向媒體出版商施加「不公平交易條款」——用人哋嘅網上內容去提供自家 AI 服務（早前新推出嘅AI整理模式），卻無提供適當補償，亦冇清晰退出機制；而同樣憂慮亦適用於用戶上載嘅 YouTube 影片之上。佢重申，「健康嘅資訊生態，建基於出版商有足夠資源繼續生產高質內容，我哋唔會容許『守門人』單方面決定遊戲規則。」

事實上多個歐洲團體早前亦曾批評Google嘅做法。例如獨立出版社聯盟（Independent Publishers Alliance）、英國非營利法律團體Foxglove，以及開放網路運動組織（Movement for an Open Web）等就批評Google打破以往「網站有流量、Google有廣告收入」嘅交換慣例，變成以AI整理行先，仲要係用網站嘅內容黎做訓練材料。

如果最終被裁定違反歐盟反壟斷規則，Google 可能面臨相當於全球年收入一成嘅巨額罰款。而對於委員會嘅調查，Google則回應指：「此次投資有機會扼殺激烈市場競爭中嘅創新發展」，並指「歐洲人理應享有最新科技帶來的益處，我們將持續與新聞及創意產業緊密合作，協助其邁向人工智慧時代。」

上週歐盟亦剛就 Meta 擬限制 AI 競爭對手使用 WhatsApp 平台展開調查，監管機構顯然準備喺新一波 AI 競賽中收緊繩索。

資料來源：Reuters