Apple於AI開發上嚴重落後於競爭對手就已經唔係啲咩新聞。而正當大家以為明年初推出結合AI嘅新版Siri情況會有好轉之時，近日就有報導傳出新版Siri於內部測試中表現非常差，搞到公司內部士氣低迷之餘仲有好多AI開發相關人才選擇「跳船」，用行動黎表達對公司前景嘅不信任。 

據《Macworld》引述《Bloomberg》著名記者Mark Gurman表示，雖然iPhone 17系列嘅銷售成績頗為亮眼，似乎表示缺乏AI功能唔會影響顧客選擇。但其實Apple面對緊嘅AI困境對其內部有更大影響，唔少AI人才都因為對公司前景不樂觀而選擇「跳船」出走，Mark Gurman更估計，假若明年初推出、包含新版Siri嘅iOS 26.4推出之後反應未如理想，可能有更多人離職，令Apple嘅後績開發更加困難。

咁實際上新版Siri目前有幾差呢？Mark Gurman指出目前Siri嘅問題係可以做嘅嘢唔夠多、真係做嘅時候又唔夠準確，新版Siri理應係要解決呢兩個問題，但依家睇黎就係兩樣都唔得。

當然，目前 iOS 26.4 尚屬內部開發階段，距離正式發布仍有時間。不過歷經多次延期，加上AI部門持續出現人手流失，要喺明年春季如期推出一個真正嘅「新」Siri，恐怕仍然樂觀過頭。

資料來源：Macworld