企業之間互相挖角人才並唔係咩新鮮事，不過將前東家嘅商業機密帶去新公司，就有違職業道德，甚至有可能被告上法庭。有外媒就發現Apple近日向美國加州法院入稟控告一名跳糟到Oppo嘅前員工「畜意竊取商業機密並透露予新公司」，法庭文件仲公開埋Apple點樣發現整件事，睇完應該會覺得呢個員工都真係唔太聰明。

Apple Watch

據《The Verge》報導，Apple控告嘅員工叫「Chen Shi博士」，曾經係Apple Watch健康偵測系統嘅開發工程師之一，能夠接觸到高度機密嘅發展路線圖、設計及開發文件，以及Apple Watch心電圖檢測嘅規格等資訊。後來呢位「Chen Shi」就以「家庭及個人理由」離職，

但Apple後來檢查呢位員工在職時使用、由Apple提供嘅iPhone時，就發現佢遺下一堆與Oppo方聯絡嘅訊息。當中提到佢去到Oppo會擔任開發檢測科技嘅組長，並指Oppo於訊息中「鼓勵、批准並同意 Shi 博士在離開 Apple 之前收集 Apple 專利資訊的計劃」。

Oppo Watch

咁實際上呢位「Chen Shi博士」又做咗啲咩呢？Apple指出「Chen Shi博士」於離職前向Oppo方傳訊息，表示自己會於返新工前，於Apple「儘量收集資料」，並刻意參加「十幾個」Apple Watch團隊技術人員嘅會議，以得知佢哋目前嘅工作方向；同時佢又下載咗63份文件去自己嘅USB手指之上。更有趣嘅係，Apple發現呢位「Chen Shi博士」於Apple提供嘅工作Mac機上搜尋「如何清除Macbook上的資料」、「別人是否能知道我開啟了Share Drive中的檔案」，顯示對方畜意收集商業機密。

至於Oppo方面就應指「我們沒有發現任何證據證明這些指控與該員工在 Oppo 工作期間的行為有任何關聯」，並強調自己「並未盜用蘋果的商業機密」，而且會「積極配合法律程序，我們相信公平的司法程序將澄清事實」。

資料來源：The Verge