為吸引更多人訂閱Premium服務，YouTube最近喺美國正式推出更經濟實惠嘅「Premium Lite」訂閱計劃，能去除音樂以外大部份影片廣告，而且收費比標準版便宜接近一半，啱晒平時主要用YouTube睇片但少聽歌嘅用戶。

先前在澳洲、德國及泰國率先試行嘅Premium Lite訂閱計劃，如今正式宣布擴展至美國市場。Premium Lite訂閱者能夠在無廣告情況下觀看大部份YouTube影片，但睇音樂影片(MV)同YouTube Shorts時就仍然會有廣告彈出，而且亦唔支援離線播放及背景播放功能。旨在向平時會用YouTube睇片，但唔需YouTube Music或額外功能嘅用戶，提供一個更有性價比嘅選擇。而價錢方面，美國標準版Premium在月費為13.99美元，而Lite版只需要7.99美元，幾乎係原價嘅一半。

目前未知Premium Lite幾時會擴展至香港及更多地區，參考現時香港標準版Premium月費為HK$78，如只按美國定價比例推算，將來Lite版可能會收HK$46左右，如果真係收呢個價，到時大家又會唔會即刻轉用Lite呢？