隨住智能手機越黎越普遍、功能亦越黎越全面，大家對於電腦嘅日常需求亦變得越黎越低，唔少人屋企根本就冇電腦，大部份年輕人更加冇用電腦嘅習慣。但呢個新風氣就產生新問題，就係當呢班年輕人出社會工作後，發現自己唔識用電腦打字！

日本媒體《BizSpa!》日前就訪問咗於全日本有190間「電腦補習班」嘅「e-tracks」經理山城和巳指，日本年輕人用電腦打字嘅能力「正產生兩極化」，換言之有一部份人好叻用電腦打字，另一部份人就完全唔識用電腦打字。背後原因就係因為年輕一代更習慣用電話。

據《BizSpa!》引述日本總務省嘅數據，2011年時20代年輕人中，有82.7%有使用電腦嘅習慣，黎到2020年數字就下降到67.98%。而且唔單止係日常生活與朋友家人溝通，有部份大學甚至容許學生用智能電話做功課，再透過Line提交，換言之有部份年輕人直到出社會前，都冇正式練過用電腦打字。

絕大部份日本人都習慣於電話上使用九宮格鍵盤輸入法，亦即係話當佢哋面對電腦嘅「Qwerty鍵盤」時係需要另一套輸入邏輯 (情況就等於香港人電話上嘅筆劃輸入法及速成/倉頡輸入法嘅分別) ；但另一邊廂，絕大部份工作，哪怕係覆個Email等都需要員工使用電腦，如果唔識打字就會令工作變得非常辛苦。所以山城和巳指出，以往只有老年人會上嘅「電腦打字班」，近年課堂上嘅年輕人比例正不斷增加。

早前我哋亦報導過，美國青年因為唔用電腦，所以唔了解所謂嘅「資料夾系統」。