噴射背包 (Jetpack) 呢個科技其實都算唔上係「新」，相信大家亦睇過唔少片係有個人揹住個Jetpack、手戴幾個噴射器，然後好似Iron Man咁一飛沖天。問題係整就整咗出黎，實際上有咩用呢？英國公司Gravity Industries就同英國皇家海軍陸戰隊合作，測試利用噴射背包，於海中心進行登船作戰！

海軍陸戰隊要面對嘅一個問題，就係點樣登上其他行駛中嘅船隻執行任務，而有咗Gravity Industries嘅噴射背包之後成件事就簡單得多，正如片中所見，噴射飛行員由橡皮艇起飛，喺空中直接追上並降落於目標船隻，再掉條繩梯落去等橡皮艇上嘅隊員能夠爬上黎，就算係完成咗登船，成個過程都唔使5分鐘。

咁當然，呢次只係演習，船上亦冇人阻止噴射飛行員接近或者降落，但都已經展示咗噴射背包嘅速度、靈活性。

Gravity Industries早前亦發佈咗一條片，展示噴射背包於陸上作戰嘅演習。片中飛行員先以噴射背包低空進場視察環境，為地面部隊提供資訊，再搵個靚位掩護隊友進場，然後又飛去另一個位繼續掩護。可以話係將噴射背包嘅靈活性展現得淋漓盡致。

Gravity Industries所製作嘅噴射背包總共有5個噴射引擎，總輸出達到1000匹，淨重21KG，每次能夠飛5至10分鐘，官方話最快可以達90km/h，但目前有紀錄嘅最快速度係136.98km/h。飛行員利用手臂活動控制四個引擎以完成平衡、移動等動作。