Apple喺香港時間今日凌晨舉行「One More Thing」活動，表面上係同大家介紹咗三款新Mac，但實際上個重點，其實就係Apple自家研發、用上ARM架構嘅第一款Apple Silicon處理器「M1」。所以只要了解咗M1同之前嘅Intel處理器有咩分別，你就知道三部新Mac究竟新喺邊啦！

圖片：Apple

ARM架構係咩黎？

M1之所以能夠引起咁大迴響，主要係因為佢第一塊用於Mac系列嘅ARM處理器，而所謂「ARM架構」係一種比起傳統電腦CPU (即係Intel、AMD目前出緊嗰啲) 嘅「x86」及「x64」架構處理器成本及耗電更低，但效能相約 (或更高) 嘅處理器。亦因為呢啲特點，所以絕大部份流動裝置，包括電話、平板、甚至部份輕量化Laptop都會用上ARM架構處理器。例如新iPhone中嘅A14處理器，就係另一款Apple自家研發嘅ARM架構處理器。

圖片：Apple

咁M1有咩好？

首先作為ARM架構處理器，M1秉承低耗電高效能嘅優點，令新Macbook嘅電池續航力比起上代多十個鐘左右，亦係點解發佈會中會出現「同樣耗電下更佳效能」呢啲字眼 (因為同樣耗電對非ARM架構CPU黎講根本就唔夠)。

咁但係Apple喺M1個設計上都有花心思嘅。首先M1晶片入面，本身就已經集齊CPU、GPU、RAM、I/O及Thunderbolt Control等多個以往係分開嘅晶片組，整合度高令效能更高之餘，亦慳咗位，令機身可以更細 (電腦就應該用唔著呢個好處)、又或者機身大小不變但可以塞大舊啲嘅電、或者大個啲嘅散熱入去。 

而M1嘅CPU部份總共有8個Core，其中四個係高效能Core、另外四個係高效率Core，以平衡處理速度及耗電量。而GPU亦有8個Core。Apple就話M1晶片比起「最新的手提電腦CPU」要快兩倍，「新Macbook Air比起市面上98%手提電腦都要快」。

圖片：Apple

M1有咩唔好？

最大嘅唔好處就係因為RAM亦都整合咗喺入面，換言之部機入面根本就冇「RAM糟」呢樣嘢，亦即係話大家冇得利用換RAM，加外置GPU等方法增強電腦處理能力。而目前三部新Mac頂都盡都只係得16GB RAM，對一般用家黎講可能都夠用，但對於需要處理大量圖像、影像工作嘅用家黎講，或者就會覺得唔夠使——咁當然，你都可以買返其他仲用緊Intel晶片嘅Macbook嘅。

另外就係由於M1使用ARM架構，而ARM架構係Run唔到x86/x64架構下嘅程式 (舉個唔準確嘅例子就係你將隻Blu-Ray隊入部PS1到，佢係Load唔到)。雖然能夠使用同為ARM架構嘅iOS及iPadOS程式，而且新嘅MacOS Big Sur亦有「Rosetta 2」幫手將本來為Inter X64/x64架構開發嘅程式「翻譯」做ARM架構，但如果想Mac用家想有最好嘅體驗，或者就要等開發商嘅更新啦。

圖片：Apple

結論

用上M1嘅新Macbook喺冇犧牲效能嘅情況下，續航力大幅拋離舊款，對於大部份普通用家黎講絕對係有用嘅改變；但若果你需要用上專業程式、要處理大理複雜嘅圖像影像工作、又或者係想拎部Macbook黎打機嘅話 (Why?)，咁我就建議大家睇定啲先，特別係要留意你想用嘅嗰個程式，於ARM架構下究竟能唔能夠正常運作。