我相信任何睇過《Star Wars》系列嘅男仔，都會想擁有一把「Lightsaber (光劍)」，而市面上亦有好多唔同產品能夠模仿光劍嘅觀感、聲效，但始終冇辦法還原光劍嘅兩個精髓：第一，光劍冇辦法好伸縮；第二，就係基本上毫無威力。而專將電影中嘅科技 「(極危險地) 具現化」嘅 Youtuber James Hobson，近日就整咗把能夠解決以上兩個問題嘅光劍。

佢用嘅方法好簡單——同時亦都好_危險——因為佢用嘅係溫度高達4000度嘅等離子。據佢早前上載嘅Youtube片中講，光劍嘅原理同Plasma Cutter非常相似，劍身其實係點著咗嘅液態丙烷溝氧氣，但因為經過一個層流噴咀，所以能夠集中於一束，變成非常幼、非常直，同時又可伸縮嘅光劍。而加入不同化學物，就能令光劍呈現不同顏色。而琴日佢又上載一條新片展示咗光劍嘅破壞力，雖然未去到原作中乜都斬得開，但依然能夠 (緩慢地) 切開金屬、刺穿玻璃，已經非常接近大家對光劍嘅期望。

不過呢把等離子光劍都有一個重大問題，就係必須連住一個供電嘅背包。James Hobson亦於影片提到，如果要做到電影中嘅效果，要用到嘅能量大概等如一整個核發電廠。