中國手機品牌One Plus於四月推出嘅8 Pro型號內置嘅「秋意」濾鏡，近日被發現有透視塑膠甚至衣服嘅功能，旋即引起大眾對於惡意使用者侵犯私隱嘅疑問，更加唔好提你同我都諗到嘅「透視走光圖」問題。而One Plus嘅回應就係會緊急推出軟件更新，修正濾鏡嘅透視問題。耐人尋味嘅係，喺更新推出之前，只有中國版OS「HydrogenOS」會立即停用該濾鏡，而國際版OS「OxygenOS」就會繼續有得用。

One Plus 8 Pro嘅「秋意」濾鏡，其實就係利用紅外光拍攝照片，而又由於紅外光嘅特性，令到濾鏡有一定透視功能，不但能睇穿塑膠，知名Youtube頻道 「Unbox Therapy」實測後更指能睇穿「較薄且單色」嘅T恤。由於事件引起極大關注，品牌於19日凌晨分別於官方微博及討論區貼出中、英告示，簡單啲講就係佢哋知道大家好緊張，但同時又有好多人話呢個濾鏡影出黎嘅相好靚，所以就會停用該濾鏡，並將以OTA更新方式，去除濾鏡嘅透視功能後重新提供使用。

但英文版嘅告示就多咗幾句，話由於中國社交網絡上有大量錯誤、誤導嘅消息，所以中國版OS「HydrogenOS」會暫時停用該濾鏡，而國際版嘅「OxygenOS」就唔會停用，用家可以繼續用到修改版完成後直接更新。咁即係因為中國人鬧得勁啲佢哋就做多啲？外國人唔鬧 (或者鬧咗但喺牆內聽唔到啦下) 所以佢哋就做少啲？定係因為佢哋對外國人比較有信心，就算有透視人家都唔會用黎做啲咩所以放心畀佢哋用；但中國人就…學某過氣男星講，係「要管的」？