《刺客教條》限量版香水　大陸發售被諷「調味料」？

文：MenClub 路兒　　圖：互聯網
POSTED ON 21 Feb 2018

作為一個出色嘅刺客，當然要識得隱藏自己嘅行蹤，先可以不動聲色殺敵攻陣。Ubisoft就推出咗《刺客教條》嘅限量版男士香水，喺中國大陸發售，仲加入花椒、苦艾酒等辛烈氣味，係咪想切合返北方同胞嗜辣口味呢？

呢款限量版香水名為「暗影」，由Ubisoft同瑞士香水品牌Firmenich聯名合作推出，以沉香木為基調，加入印尼依蘭，以及氣味濃烈辛辣嘅花椒同苦艾酒，單係睇香味成份都覺得相當刺激呀。宣傳品上面話，命名為「暗影」係取意「暗影之下，唯有勇者」。

香水售價349人民幣，有指唔少商店已經售罄，市面難以買到。不過網民對呢瓶刺客味道嘅香水似乎評價麻麻，有留言嘲諷「四川辣椒？料酒？香料？這是調味料吧」、「忍不住拿來炒菜了」、「這分明是防狼噴霧」，又話落花椒「想辣死護衛」，笑言係「四川人民的味道」。睇返呢款「暗影」於2015年曾經喺巴西開售，事隔兩年Ubi又搬返出嚟喺中國大陸賣，到底係打咩如意算盤？除咗四川同胞愛花椒之外真係諗唔到。