Boston Dynamics研發嘅機械狗SpotMini已經進化到識開門，似乎機械人統治地球又近了一步。今屆南韓冬季奧運會上機械人亦相當搶鏡，除咗有份傳聖火，日前仲成為「參賽者」——冬奧場邊咗舉辦首屆機械人滑雪比賽。

話明係首屆機械人滑雪比賽，八位「參賽者」當然全部係智能機械人，由韓國嘅大學及科技公司研發，在冬奧場邊爭奪「雪地之冠」。佢哋當日要完成全長80米長嘅賽道，中間更需要繞過不同顏色嘅障礙物，每繞過一道障礙物會加一分，總分以時間同得分計算。

聽落似乎唔難，但因為狂風同寒冷天氣嘅關係，部分機械人都未能完成賽事被「DQ」。最終勝出比賽嘅係Mini Robot Corp.研發嘅Taekwon V。呢個小機械人只係高125cm，重43.06kg，內置21組動力感應器，用咗18秒就順利完成賽事。研發人員話，最大嘅難處係要機械人準確辨認顏色，行去指定嘅路線越過障礙物，畢竟佢哋唔同人類，只係靠鏡頭同感應器去分辨，陰影同陽光底下嘅顏色對機械人嚟講已經有分別。