小編知道有批死硬派「巴打」，每分每秒都要孖實牛仔褲做連體嬰，無論當日天氣係點、攝氏幾多度，都只會著住條牛仔褲周圍去，你可以話佢哋對牛仔褲忠貞不二，亦都可以話佢哋懶到爆，完全唔再諗著其他褲見人，總之一生一世都要與牛仔褲永不分離。

但氣溫一日比一日咁升上去，連晚間氣溫都達至30度嘅時候，仲堅持要著住牛仔褲嘅仁兄，好有可能會支持唔住中暑收場，既然係咁，不如搵個折衷方法，試吓改為獨沽一味專著爛牛ripped jeans，始於褲上有幾個地方通窿，起碼可以幫你通吓風，再講偏窄身ripped jeans，著上身之後，不期然地會散發出一陣陣不覊的風，好有我行我素嘅感覺！

爛牛ripped jeans襯搭tips

第一︰為咗進一步營造浪子形象，可以在上身再襯搭多件牛仔item，可以唔著只綁係腰間，上身就只穿件素色tee便完成。

第二︰牛條褲形象百搭，爛牛都唔例外，襯現時各大品牌狂推嘅膠拖亦無難度，將兩者放埋一齊，好有懶洋洋嘅感覺，更進一步散熱。

第三︰素色為主。爛牛形象解明，為咗唔好互搶風頭，上身盡量以簡單素色為主，亦可保持一貫瀟灑不造作嘅感覺。

第四︰Dr.martens出品嘅鞋款，不嬲都好有英倫街頭feel，搵佢襯爛牛，兩者混然天成地咁夾，小編覺得長靴款更加係絕配。