明白各位巴打都想著得有型有款上街去，但奈何天氣要同大家作對，日日頂住三十幾度天氣，幾咁想打扮嘅決心都會被溶化啦！最好日日著件T恤就算數，著得幾少得幾少。

但就算你真係諗住著T恤上陣，選擇時都唔可以太過求其，因為咁樣被人覺得你著住件內衣行街就唔好啦！咁點算好呢？唔駛灰心，只要選擇T恤時，記得以下三大法門就OK；

鮮色搶眼圖案款

真正內衣款式，多數都離唔開黑白灰三色，所以，要將身上面嘅T恤，與內衣撇除「關係」嘅最佳方法，就係選擇sharp色，或者印有搶眼圖案嘅T恤設計，咁就包保無人會話你件T恤似內衣啦！

棄貼身 撐特大剪裁款

內衣剪裁多以貼身為主，目的就係可以方便你將佢收係面衫入面，基於呢種原因，當你要挑選T恤款式時，就要盡量避免素色兼貼身嘅T恤，反正而家都流行over-sized款式，又夠晒通風，嚟緊再熱啲都無有怕。

素色T恤 宜配襯飾物

如果你真係覺得素色、兼fit身剪裁嘅T恤最合你心意，無問題，你都可以照著，只要你肯襯番啲配飾，例如草帽、太陽眼鏡、頸鍊等等，有返啲stylish感，應該就可以避開同內衣嘅「外表」相撞嘅問題嘞。